நாய்ஸ் பொலுாசன் -வடக்கும் சத்த மாசும் !

நாய்ஸ் பொலுாசன் !(நாய்கள் பாவம் ! அவற்றுக்கும் இந்தக் கட்டுரைக்கும் எவ்வித சம்பந்தமுமில்லை.-Noise Pollution )

காது கிழிய சத்தம் போட்டு விழாக்கொண்டாடும் காட்டுக் கலாச்சாரத்தை இவ்வளவு நாகரிகம் அடைந்த பிறகும் நாம் விடுவதாயில்லை . மத்திய சுற்றாடல் அதிகார சபையால் அண்மையில் ஏற்பாடு செய்யப்பட்டிருந்த திண்மக் கழிவு வகைப்படுத்தி அகற்றும் நிகழ்வில் (கிட்டு அல்லது சங்கிலியன் பூங்காவில்) குழாய் ஸ்பீக்கர்களையும் கட்டி அலற விட்டபடி இருந்தார்கள். நான் சென்றபோது அந்த  உயர் பதவியிலிருந்த  பெண்மணி உட்பட்ட மற்றவர்கள் சிலர் தங்களுக்குள்ளேயே கலந்துர‌ை‌யாட முடியாது..கத்திக் கத்திப்‌பேசிக்கொண்டிருந்தார்கள். நான்  சொன்னேன்   ” முதலில் சத்தத்தை குறையுங்கள் அப்புறம் உங்களுடன் நான் பேச வேண்டி இருக்கிறது" ." Why why what's wrong?" என்றார்கள். .  சுற்றாடல் அதிகார சபையே குழாய் ஸ்பீக்கர் பயன்படுத்தும் பொறுப்பற்ற செயலைக்குறிப்பிட்டேன் , உடனே சத்தம் நிறுத்தப்பட்டது. பல அரச அலுவலகங்கள் பிறர் குறிப்பிட்டும்  சத்தம் ‌ போடுவதை நிறுத்துவதில்லை. அந்த வகையில் சுற்றாடல் அதிகார சபை பாராட்டப்படத்தக்கது. :) 

சத்த மாசைக் கட்டுப்படுத்த வேண்டிய சுற்றாடல் அதிகார சபையே சத்தத்தை  -சட்டத்தை மீறிப் போட்டது - இலங்கை போன்ற நாடுகளின் பலவீனமான அரச நிறுவனங்களின் செயற்றிறனிற்கும் - நெறிமுறைகளை கடைபிடித்தலில் காணப்படும் குறைபாடுகளிற்கும் தகுதியற்றவர்கள் மற்றும் திறமையற்றவர்கள்  அரச துறையின் உயர் பதவிக்கு வருவதால் ஏற்படும் துயரங்களிற்கும் உதாரணம்.

60  டெசிபல் என்ற அளவுக்கு மேற்பட்ட சத்தம் தொடர்ந்து கேட்கப்படுவதனுாடாக செவிட்டுத்தன்மை முதல் மன ரீதியான பாதிப்புக்கள் வரை  மிகப்பாரதுாரமான பாதிப்புக்களை நீங்கள் எதிர் கொள்ள நேரிடும்.

பக்கத்து வீட்டுக்காரர் குப்பையை  பற்றவைக்கும் போது புகை கண்ணை எரிப்பதாலும் நாற்றம் வருவதாலும் அவர்களுடன் சண்டைக்குச் செல்லும் நாம் , சத்தத்தின் அபாயத்தை அறியாமலே சகித்துக்கொள்ளப்பழகி விட்டோம். 

பெரும்பாலும் வடக்கு மாகாணத்திலே அதுவும் யாழ் பிரதேசத்திலேயே சத்த மாசு மிக அதிகமாக உள்ளதாக நான் அனுபவ ரீதியாக உணர்கிறேன். 70 முதல் 85 வரையான     டெசிபல் அளவில் ஒலிக்கும் சத்தத்தை ஆகக்கூடியது 8 மணி நேரம் ‌தான் சாதாரண காதுகளால் கேட்டுத்தாக்குப்பிடிக்க முடியும். சாதாரணமாக ஒரு நகரப்போக்குவரத்தில் வாகனங்களின் இரைச்சல் 85 டெசிபல் வரை (சராசரியாக ) இருக்கும். 

அலாரம் அடிக்கும் கடிகாரச்சத்தம் 80 டெசிபல் சத்தத்தை உருவாக்கக் கூடியது. மேலும் வெவ்‌வேறு கருவிகள் ஏற்படுத்தும் சத்தத்தின் அளவு எவ்வளவு என இங்கே பல படங்களில் காட்டப்பட்டுள்ளது.

வடக்கில் சத்தம் கடவுளோடு தொடர்புபட்ட பல விழாக்களில் ஏற்படுத்தப்படுவதால் சென்ரிமெண்ட் ரீதியாக மக்கள் அதனால் பாதிக்கப்டடிருந்தாலும் கடவுள் விடயம் என்று பல்லைக் கடிக்க பழகிவிட்டிருக்கிறார்கள். கடவுள் ஒருநாளும் வேலோடு வந்து குத்தமாட்டார் என்ற உண்மை தெரிந்த ஒரு சிலரே அதிக ஒலியால் ஏற்படும் சத்தங்கள் பற்றி கோவில்களிடம் முறையிடுகின்றனர். பெரும்பாலும் தீர்வு கிடைப்பதில்லை.

சத்த அளவும் தொடர்ந்து கேக்கக்கூடிய நேரமும்

எனது கல்வி நிறுவனமொன்றிற்கு முன்னால் சுமார் 7 அல்லது 8 பேர் மட்டுமே வழிபடும் ஒரு கோவிலிலிருந்து தினசரி 4 மணியிலிருந்து காது அதிரப்பாடல்களைப் போடுவர்.எனது அலுவலகத்தில் சக ஊழியர்களோடு   பேசக்கூட    முடிவதில்லை. அது பற்றி எனது  நண்பராகிய ஒரு பிரதேச செயலாளரிடம் தொலைபேசியில் முறையிட்டேன் . அவர் சொன்னார்...:”சட்டப்படடி வழிகள் இருந்தாலும் என்னத்துக்கு உனக்குப்பிரச்சினை பேசாமல் அட்ஐஸ்ற் பண்ணிப்போ ”. 

இந்த முதுகெலும்பற்ற அரச நிர்வாகச்செயற்பாடுகளும் அதி பயங்கர சூழல் மாசுகளிற்கு காரணமாக அமைவதை கண்டு கையாலாகாமல் இருக்க வேண்டி இருக்கிறது.  

கோவில்களைத்தாண்டி தேநீர்ச்சாலைகளில் காது கிழியும் அளவு ஒலியில் பாடல்களை தெளிவற்று ஒலிக்கும் வகையில் போட்டிருப்பர். பெரும்பாலும் எவ்வித கல்வியறிவும் அற்றவர்களால் பெரும்பாலும் இந்த சிறிய கடைகள் நடாத்தப்படுவதால் ஒலி அவர்களுக்குச் செய்யும் சேதம் பற்றி அவர்கள் அறிந்திருப்பதில்லை. காசு கொடுக்கும் போதும் உணவு வகைகளை ஓடர் பண்ணும் பொழுதும் 2 அல்லது 3 தடவைகள் சொல்ல வேண்டி இருக்கும் ,இருந்தும் அவர்களிற்கு சத்தத்தை குறைக்க தோன்றுவதே இல்லை . அந்த சத்த அளவுகள் சராசரியாக 100 டெசிபலுக்கு மேல் இருந்தது.  

70  டெசிபலுக்கு மேற்பட்ட சத்த மாசு பின்வரும்  பாதிப்புக்களை உருவாக்கும்

1) இரத்த சுற்றோட்டம் சம்பந்தமான பிரச்சினைகள்

2) மன அழுத்தம்

3)கவனக் குறைபாடு

4)மாணவர்களில் கல்விச் செயற்பாட்டுப் பாதிப்பு

5)நினைவாற்றல் சிதைவு

6)செவிட்டுத்தன்மை

7) சிசு வளர்ச்சியில் உடல் உளம் சார்ந்த பாதிப்புக்கள்

8)நிம்மதியின்மை - எரிச்சல் மனப்பான்மை

சத்தத்தின் அளவு மட்டுமன்றி அவற்றை தொடர்ந்து ‌கேட்கும் நேர அளவையும் பொறுத்தே பாதிப்பு அமையும்.

பின்வரும் நடவடிக்கைகளை நாம் உடனே பின்பற்ற ஆரம்பிக்க வேண்டும்.

1) குழாய் ஸ்பீக்கர்களை எக்காலத்திலும் பாவிக்காது விடல்

2)ஒலி பெருக்கிச் சாதனங்களை வாடகைக்கு விடுவோர்க்கு கொஞ்சமாவது சத்த மாசு பற்றி கூறுதல்(விழிப்புணர்வு)

3)அரசாங்கம் 60 டெசிபலிற்கு மேற்பட்ட சத்தங்களை கட்டுப்படுத்தும் வரைபை தயாராக வைத்துள்ளது அது அமுல் படுத்தப்படும் வரை சத்த மாசுக்பெதிரா இயலுமான விழிப்புணர்வுச் செயற்பாடுகளை முன்னெடுத்தல்

4)நாம் எமது வீட்டுச் சூழலில் சத்தம் போடாது நல்ல கலாச்சாரத்தை பின்பற்றலும்  பிள்ளைகளிற்கு பழக்கலும்.

குழாய் ஸ்பீக்கர்கள் உலக அளவில் தடைசெய்யப்பட்டு பல வருடங்களாகிறது. எங்கள் நாட்டில்தான் இன்னும் சிற்சில இடங்களில் பயன்படுத்தப்படுகிறது.அவற்றை வடக்கிலிருந்தும் முற்று முழுதாக அகற்ற வே்ண்டும்.

பல்வேறு வகையிலும் அனுதினமும் சத்தத்தால் திக்கப்பட்டுக்கொண்டிருக்கும் பொதுமக்களில் நானும் ஒருவன். பிரச்சினைகளைப் பார்த்து அந்த நிமிடம் மட்டும் துணுக்கிட்டு விட்டுப் போவது சாதாரண மக்கள் இயல்பு. என்னால் எப்போதுமே சாதாரணமாக இருக்க முடிவதில்லை. ஒரு மாற்றம் வரவேண்டும் என்று எண்ணுகிறேன். எனவே பிரச்சினைகளை எனது பதிவில் பட்டியலிட்டிருக்கிறேன் .

இந்த சத்த மாசிற்கு எதிரான  போராட்டம் தொடரும். காணும் போதெல்லாம் கைகொடுங்கள். சுத்தமான சூழலை எங்கள் சந்ததிக்கு கையளிப்போம்.