சாம்பற் குருவியின் வரிமறந்த பாடல்

எனக்கு இருந்தது ஒரு காடு..
முட்களையும் இலைகளையும் முடிந்து..எப்ப‌டியோ..
எனக்கு பிடித்தபடி  அமைத்தேன் கூட்டை.

வரிமறந்த பழைய பாடலை அடிக்கடி
அபஸ்வரத்தில் பாடுவேன்.
நான் மட்டுமே கேட்க.

காலை வி‌டியக் கூவும் கடமை எனக்கில்லை.
எழும்புவேன் எப்பொழுதாயினும்.
சுள்ளெனச்சூரியச்சட்டியின் எண்ணைத்துளி சிந்தியாயினும்.
தினசரி
ஒரு பொழுதில் எழுவேன்.


பிறகு .. பாடலும் ...தேடலும்..கூடலும்.

அதே வரி மறந்த பாடல்தான் ....என்றாலும் ருசிக்கும் என் வாழ்வு.

நீயோ அல்லது பன்மையைச்சுட்டும் நீங்களோ
என் கூட்டில் ஒரு பருக்கைகூட விட்டெறியாதவர்கள்.

எந்த திசையில் நீங்கள் பஞ்சம் பிழைப்பவரோ
நானறியேன்.

கற்பனையில் கூடக் காணாத அருவம்   .

இலக்கணமில்லாத பாடல்...இடியுங்கள் இதன் கூட்டை என்றீர்கள்.

நானோ கவர்ச்சியற்ற சாம்பல் குருவி...
மயிர் கொட்டும் பருவத்தில்
பொறுக்க வந்த நாவல் பழங்களிற்காய்..

நெருப்பில் வாட்டப்பட்ட வரலாறை

எந்த வாயால் பாடுவதென்று தெரியாமலே


எரிந்துகொண்டிருக்கிறேன்.